移民台灣|居台港人親身經歷 揀移民台灣定英國?住過多個地方仍選移民台灣!

Updated: Aug 30



【移民台灣】英國放寬BNO持有人移民規定,令移民英國、台灣成為近期熱話!如果有得揀,你會想移民台灣還是英國?而移居台灣5年的里奧叔叔,在香港居住了12年、美國住了4年、中國住了5年,現時他與家人在台灣住了5年,到底里奧為何會踏上移民台灣的路? 如果有得揀,你會做台灣人還是英國人?

最近炒得最火熱嘅,相信係英國放寬港人持BNO居留英國嘅話題,對於已經成為台灣人嘅里奧好似又多咗個選擇咁!不過,如果萬一英國真係咁慷慨畀大家去做英國人,你又係咪真係會去呢?里奧就應該唔會喇!仲係比較鍾意做台灣人多啲!


香港居住了12年、美國住了4年、中國住了5年


為何會踏上移民台灣的路?

當然,呢個只係里奧嘅個人立場,里奧嫂睇到有關BNO嘅新聞都忍唔住問里奧:「雖然知道你鍾意台灣,但萬一真係可以帶兩個女去英國讀書,而你又有能力可以去生活,咁你又會點決定呢?」呢一下我真係停咗幾秒,猶豫咗一陣都係唔知點答佢,主要原因唔係考慮自己咁簡單,但最後都係答no!最後呢個話題就成為咗里奧同太太尋晚嘅傾偈話題。



西方國家好嗎?相信每個人嘅睇法都唔同,亦唔會有一個標準答案,但自己就有咁嘅體驗,我曾去過美國加州讀過幾年書,讀書時期「冇王管」,每晚約埋班朋友喺UC Berkeley 飲住cappuccino做功課,做完就走去機舖打番幾鋪《街霸II》,Friday night 就例牌有party,周末遊車河,冬天去Lake Tahoe 滑雪,夏天就海灘曬太陽,都不知幾爽,冇錢就走去餐館打幾日黑市工(留學生不能工作),嗰時嘅里奧覺得美國先係自己嚮往生活嘅地方,但讀完書又入唔到美籍就只能夠返香港,當時自己有一個信念:有朝一日,我一定會移民美國!



返到香港之後,誤打誤撞咩工都試下,最後入咗一間中港生意公司,再被公司派到中國西南區長駐,一去就5年。當時因工作關係對中國式嘅生活同做事方式都算了解,晚晚收工咪被安排食飯飲酒,識人就係最主要嘅工作,日復日年復年,好彩當時年輕力壯,否則可能中酒精毒去咗極樂。



為了孩子移民台灣

5年真係一個唔短嘅日子,再返到香港之後,里奧都好唔習慣,而且朋友都覺得里奧當時國產味好重,「早上好」、「服務員」、「打車」、「打的」 嗰D詞彙出晒嚟,好唔容易再次融入香港生活。但結婚生女後,就感到香港赤化愈嚟愈重,加上自己喺中國內陸長駐過,一場雨傘運動就決定帶埋家人離開香港,移民台灣。



里奧喺香港住咗12年、美國住咗4年、中國住咗5年、台灣住咗5年。如今40出頭,如果再畀我揀,我相信都係會揀台灣。



台灣生活邊度好?

冇一個地方係完美,台灣都有唔少缺點,有時候睇到好多人分享台灣生活邊度好、咩福利正,里奧都未必好認同,簡單講過嘅情理法都已經覺得唔合理,但係有一樣自覺得好舒服嘅係「自在」。


台灣生活好自在,做生意做得好自在,交朋友亦交得好自在,呢幾年里奧多數與台灣人來往,從來都未有過咁自在嘅感覺,喺台灣生活唔會怕治安唔好,唔會怕醫療費高,唔會被種族歧視。做生意唔會有部門嚟搞你,除非你有把柄被人檢舉,唔使下下請部門食飯拉關係,交朋友又唔使下下斤斤計較,唔使打量別人用心,生活各方面都好自在。


如果係你,你又會點揀呢?



新冠肺炎期間,我們已成功協助許多客戶進行投資移民第一階段,想知道如何做到,請按下方連結預約免費諮詢。

港台兩地移民顧問,同步專業免費諮詢

https://www.shalom.hk/consulting

資料來源︰https://www.gotrip.hk/577632/%e7%a7%bb%e6%b0%91/%e7%a7%bb%e6%b0%91%e5%8f%b0%e7%81%a3%e5%ae%9a%e8%8b%b1%e5%9c%8b/2/

#台灣移民#移民台灣#台灣投資移民#投資移民#台灣#台灣創業#taiwanimmigration#taiwaninvestment#taiwaninvestorvisa#新冠肺炎

1,109 views

COPYRIGHT(C) PROSPERITY IMMIGRATION CONSULTANCY LTD. ALL RIGHTS RESERVED